Skemman (Island)
Not a member yet
50783 research outputs found
Sort by
Fjárþurfi Þjóðarsport: Staða rekstrar og vinsælda handknattleiks á Íslandi
No full textViðfangsefni ritgerðarinnar er staða íslensks handknattleiks, með tilliti til rekstrar og vinsælda. Síðustu misseri hefur umræða um íslenskan handbolta verið neikvæð, þá sérstaklega varðandi rekstur Handknattleikssambands Íslands, og lítið til af gögnum og/eða rannsóknum tengdum málefninu. Vilji var því til þess að skoða stöðuna, og sett fram rannsóknarspurningin „Hver er staða íslensks handbolta varðandi fjárhag og vinsældir og hvers vegna er rekstrarstaða HSÍ svona slæm?“. Reynt var að svara því með því að skoða ársreikninga HSÍ og félagsliða hérlendis, ásamt að safna gögnum um áhorf og aðsókn á keppnisleiki hérlendis. Niðurstaða ritgerðarinnar er sú að fjárhagsstaða bæði sambandsins og félagsliðanna er afar slæm, en HSÍ er aðallega að gjalda fyrir árangur landsliða sinna. Þá hefur aðsókn minnkað allverulega og það líklegast bitnað á fjárhag félagsliðanna. Á meðan virðist áhorf vera á afar góðum stað, bæði á deildarkeppni hérlendis og sérstaklega á A-landslið karla. Þetta misræmi milli vinsælda og tekjustöðu er afar áhugavert og sérstakt áhyggjuefni. Vonandi er þessi ritgerð, sem er eftir bestu vitneskju höfundar sú fyrsta sinnar tegundar, leið fyrir HSÍ og félagsliðin til þess að fá góða mynd af núverandi stöðu og hvati til þess að leita að leiðum til þess að bæta hana
Reynsla foreldra uppkomins fatlaðs fólks af flutningi þess úr foreldrahúsum
No full textMarkmið rannsóknarinnar var að varpa ljósi á reynslu foreldra uppkomins fatlaðs fólks af flutningi hinna síðarnefndu úr foreldrahúsum. Sérstaklega var horft til reynslu foreldra varðandi aðdraganda að flutningi, umsóknir um búsetuúrræði og hvernig þjónustuþörfum fatlaðra barna þeirra væri mætt. Rannsóknin er eigindleg og unnin samkvæmt vinnulagi grundaðrar kenningar í anda félagslegrar mótunarhyggju. Þátttakendur voru foreldrar átta fatlaðra einstaklinga en skilyrði fyrir þátttöku var að vera foreldri fullorðins fatlaðs einstaklings sem var að fara að flytja eða var fluttur að heiman. Þrír fatlaðir einstaklingar voru við það að flytja en hinir fimm voru fluttir að heiman. Gagna var aflað með hálfopnum viðtölum og þau kóðuð og greind í framhaldinu. Niðurstöður rannsóknarinnar sýndu að „kerfið“ hafði gert ráð fyrir því að fjölskyldur sæju alfarið um uppkomin börn sín meðan þau bjuggu enn í foreldrahúsum. Það leiddi til þess að foreldrum fannst erfitt að treysta kerfinu og stíga til hliðar þegar að búferlaflutningum kom. Það tók mjög á fjölskyldurnar að reyna að fá viðeigandi búsetuúrræði fyrir uppkomin börn sín og í umsóknarferlinu var takmarkað val um húsnæði og skortur á leiðbeiningum um hvernig best væri að standa að málum. Fram komu mýmörg dæmi um það að takmarkað tillit væri tekið til einstaklingsbundinna og fötlunartengdra þarfa unga, fatlaða fólksins eftir að þau fluttu að heiman. Stöku foreldrar óttuðust að börn þeirra yrðu misnotuð á einhvern hátt og tengdu það ónógu eftirliti með starfsemi þjónustuúrræða. Svo virtist sem kerfið gerði áfram ráð fyrir aðkomu fjölskyldunnar eftir flutning úr foreldrahúsum og það var oft forsenda þess að allt gengi vel eftir. Þótt foreldrar hafi allir lýst þrautargöngu og glímu við kerfið þegar þeir litu yfir farinn veg voru málin þó oft komin í betri farveg þegar gagnaöflun fór fram. Margt í frásögn foreldra bendir til þess að þjónusta við fatlaða einstaklinga á Íslandi standist ekki þær kröfur sem koma fram í Samningi Sameinuðu þjóðanna um réttindi fatlaðs fólks, sem og lög um þjónustu við fatlað fólk með langvarandi stuðningsþarfir nr. 38/2018
Ecology of Hypoponera spp. (Hymenoptera: Formicidae) in Icelandic geothermal areas
No full textMaurar eru ein algengustu skordýr jarðar, og finnast í öllum heimsálfunum að Suðurskautslandinu undanskildu. Á síðustu áratugum hafa maurar numið land á Íslandi og þeim fjölgað, en flestir maurar finnast í hituðum húsum í þéttbýli. Nýlega fundust tvær tegundir maura af ættkvíslinni Hypoponera á íslenskum jarðhitasvæðum. Markmið verkefnisins var að rannsaka dreifingu og vistfræðilega eiginleika tegundanna tveggja nánar. Farnir voru könnunarleiðangrar og framkvæmdar vistfræðilegar kannanir á 33 aðgreindum hverasvæðum víða um land en einnig mánaðarlegar athuganir á 2 svæðum milli mars 2024 og febrúar 2025. Bú húsamaura (H. ergatandria) fundust nokkuð víða, frá vesturenda Reykjaness, víða á Hengilssvæðinu, í Skagafirði, og á Vestfjörðum. Í þessum rannsóknum fundust einnig maurar, sem ekki höfðu verið skráðir á Íslandi áður og við köllum hveramaura (H. eduardi). Útbreiðsla hveramaura nær til jarðhitasvæða umhverfis Hveragerði og upp í Haukadal, og virðist landfræðilega takmarkaðri en hinnar tegundarinnar. Mánaðarlegar athuganir sýndu að hveramaurar eru virkir allt árið um kring, en sambærileg vetrarvirkni sást ekki í húsamaurum sem virðast fara í dvala yfir kaldari mánuðina. Báðar tegundirnar eru enn bundnar við svæði með jarðhita, en kannanir á mauralausum jarðhitasvæðum benda til þess að á flestum þeirra séu ágætis aðstæður fyrir landnám beggja tegunda. Gögnin virðast ekki sýna sterk neikvæð áhrif tegundanna á samfélög hryggleysingja á svæðunum. Engu að síður er mikilvægt að fylgjast áfram með maurum á þessum svæðum svo hægt verði að greina frekari dreifingu og þróun hugsanlegrar ágengrar hegðunar.Ants are among the most ubiquitous invertebrates on Earth, found across all major continents, except for Antarctica. Recently, these small eusocial insects have started arriving in Iceland and are increasing in abundance. While most establish colonies in urban areas, often inside heated buildings, two Hypoponera ant species have been found in Icelandic geothermal areas . This project centres on analysing their distribution and ecology. To do this, structured quadrat surveys were conducted in 33 different geothermal sites across the country and more focused Monthly surveys in 2 areas from March 2024 to February 2025. Populations of H. ergatandria (húsamaur) were discovered on the tip of the Reykjanes peninsula, throughout the Hengill area, to the Skagafjörður region and the Westfjords. Populations of a second ant species, H. eduardi (hveramaur), previously undocumented in Iceland, had more restricted geographic distribution, from Hveragerði to Haukadalur. Colonies of H. eduardi were found active all year round, while H. ergatandria was not documented as active in the winter months. Though the thermal tolerance range of both species appears to restrict their distribution to geothermal areas, majority of the surveyed geothermal sites (including those ant-free) appeared to have favourable environmental conditions, potentially open for further colonisation of the species. The data do not suggest the species exert strong negative effects on native invertebrate communities, though it is important that monitoring is maintained to document their spread and development of potentially invasive behaviour
Hvað stendur 10-12 ára börnum til boða varðandi tómstundir í Reykjavík?
No full textVerkefnið fjallar um stöðu tómstunda hjá börnum á aldrinum 10–12 ára (á miðstigi grunnskóla) og þær kerfislægu hindranir sem hafa áhrif á þátttöku þeirra
Er markmálið notað í kennslu íslensku sem annars máls?
No full textÍ þessari ritgerð verður fjallað um það hvort markmálið eða móðurmál nemenda sé notað í kennslu íslensku sem annars máls í málaskólum á Íslandi. Nú á dögum bjóða málaskólar upp á íslenskunámskeið fyrir fullorðna nemendur sem deila sama móðurmáli. Notkun móðurmáls nemenda í annarsmálskennslu er umdeilt umræðuefni á sviði annarsmálsfræða þar sem fræðimenn eru ekki sammála um það hvort betra sé að styðjast við móðurmál nemenda eða markmálið í annarsmálskennslu. Til að kanna hvaða kennslumál er aðallega notað í kennslu íslensku sem annars máls var gerð könnun sem send var í helstu málaskóla á höfuðborgarsvæðinu. Markmið könnunarinnar var að varpa ljósi á hvaða kennslumál er notað í kennslunni og einnig viðhorf kennara til þess hvort betra sé að nota markmálið eða móðurmál nemenda í íslenskukennslu
Arðsemi menntunar: Fjárhagslegur ávinningur af háskólanámi
No full textÍ þessari ritgerð er fjallað um arðsemi menntunar á Íslandi með áherslu á fjárhagslegan ávinning af því að afla sér háskólamenntun. Markmið ritgerðarinnar er að kanna hvort háskólamenntun skili sér í hærri launum og auknu atvinnuöryggi, auk þess sem sérstök áhersla er lögð á að greina hvort munur sé á arðsemi menntunar milli karla og kvenna. Rannsóknin byggir á hagfræðilegum kenningum um mannauð, þar sem menntun er skilgreind sem fjárfesting sem skilar ábata til framtíðar og kenningu um merkjagjöf þar sem að menntun er notað sem skimunartæki til þess að aðgreina hæfileikaríka einstaklinga á vinnumarkaði frá þeim sem eru ekki eins hæfileikaríkir.
Greiningin byggir einkum á gögnum frá Hagstofu Íslands um laun, atvinnuþátttöku, starfssvið og menntunarstig einstaklinga á Íslandi. Fjárhagslegur ávinningur menntunar er metinn meðal annars með útreikningi innri vaxta, þar sem tekið er tillit til bæði beins og óbeins kostnaðar við háskólanám. Jafnframt er skoðað samband menntunar og atvinnuöryggis, til að meta hvort háskólamenntun tengist stöðugri þátttöku á vinnumarkaði.
Niðurstöður ritgerðarinnar benda til þess að háskólamenntun hafi jákvæð áhrif á bæði laun og atvinnuöryggi einstaklinga á Íslandi. Hins vegar kemur fram að launaaukning vegna háskólamenntunar hafi farið lækkandi á síðastliðnum árum. Arðsemi menntunar meðal þeirra sem starfa við sérfræðistörf reyndist að jafnaði 10,2% samkvæmt útreikningi innri vaxta þar sem að viðmiðunarhópur voru ósérhæfðir. Þessi niðurstaða tekur mið af heildarlaunum fyrir skatt. Þegar niðurstöðurnar eru greindar eftir kyni kemur í ljós að arðsemi menntunar er svipuð hjá körlum og konum, þar sem karlar mælast með 11,5% arðsemi og konur með 11,4%. Þessar niðurstöður benda til þess að háskólamenntun sé áfram arðbær fjárfesting fyrir einstaklinga, þrátt fyrir minnkandi launaaukningu, og að kynjamunur í arðsemi menntunar sé lítill samkvæmt þessari greiningu
Ekki alltaf glimmer og Pride: Ofbeldi í nánum hinsegin samböndum
No full textEfni þessarar meistararitgerðar er ofbeldi í nánum samböndum (e. intimate partner violence, IPV) innan hinsegin samfélagsins á Íslandi. Ofbeldi í nánum samböndum getur birst í andlegu-, fjárhagslegu-, líkamlegu-, og kynferðislegu ofbeldi sem gerandi beitir þolanda. Rannsóknir á þessu viðfangsefni á Íslandi hafa verið takmarkaðar til þessa, og því er lítið vitað um það, að hve miklu leyti jaðarsetning hinsegin fólks hefur áhrif á upplifun þess af ofbeldi í nánum hinsegin samböndum í íslensku samhengi. Erlendar rannsóknir benda til þess að jaðarhópsálag (e. minority stress) og sambandsfordómar (e. relationship stigma) hafi neikvæð áhrif á gæði hinsegin sambanda. Lagaleg og félagsleg staða hinsegin fólks á Íslandi telst sterk í alþjóðlegum samanburði. Þrátt fyrir það eru þessir þættir teknir til skoðunar til að varpa ljósi á reynslu þolenda ofbeldis í nánum hinsegin samböndum, í þessu tiltekna samfélagslega og menningarlega samhengi.
Rannsóknin byggir á eigindlegum aðferðum, þar sem tekin voru fjórtán hálfstöðluð viðtöl við þolendur ofbeldis í nánum hinsegin samböndum. Í greiningunni er fjallað um ólíkar birtingarmyndir ofbeldis, þar á meðal hvernig andlegt, fjárhagslegt, líkamlegt og kynferðislegt ofbeldi birtist í hinsegin samböndum. Jafnframt eru afleiðingar ofbeldisins á þolendur skoðaðar ásamt því hvernig ríkjandi staðalmyndir og jaðarsetning hinsegin samfélagsins hefur áhrif á afleiðingar, berskjöldun og úrvinnslu. Niðurstöður rannsóknarinnar benda til þess að ofbeldi í nánum hinsegin samböndum einkennist oft af valdaójafnvægi sem á rætur að rekja til hinseginleika sambandsins. Gerendur sem höfðu gjarnan verið opin um kynhneigð eða kynvitund sína í lengri tíma, voru betur tengd hinsegin samfélaginu eða höfðu meiri reynslu af hinsegin samböndum en þolendur og það var meðal þess sem skapaði ójafnvægi innan sambandanna. Afleiðingar ofbeldisins fyrir þolendur voru félagslegar, fjárhagslegar og heilsufarslegar. Samtvinnun mismunabreyta (e. intersectionality) virtist auka alvarleika þessara afleiðinga, á meðan kynjaðar staðalmyndir um gerendur og þolendur höfðu áhrif á getu þolenda til að greina ofbeldið, sem og vilja þeirra til þess að opna sig um það. Slíkar staðalmyndir mótuðu einnig viðbrögð sem þolendur fengu þegar þau opnuðu sig um ofbeldið, bæði við sér nákomna og þegar þau leituðu eftir faglegri aðstoð
Synthesis of porous coordination polymers using multifunctional ligands for selective adsorption of organic solvents.
No full textPorous Coordination Polymers (PCPs) a frontier pushing class of materials with tunable properties and applications spanning multiple disciplines. The creation of PCPs can be unpredictable and challenging due to the highly specific set of conditions required for its synthesis to be successful. Moreover, every factor, such as choice of ligand, metal salt, solvents, pH, temperature, time, and precisely controlled ratios between all of these factors need to be optimized. Even with every factor under control the final result can be of an unexpected geometry. After overcoming these difficulties, we obtain an exceptionally versatile material that can be functionalized in multiple diverse ways as well as modified to better fit a specific purpose. This master’s thesis gives a deeper look into the process of developing a synthesis for two types of PCPs. One type uses disulfide bond containing ligands and Zn (II) metal centers to create a PCP for selective adsorption of organic solvents. This PCP was found to possess two derivatives as the solvent in its pores was expunged, undergoing a reversible single-crystal to single-crystal transformation. The other PCP was synthesized using Cu(II) metal centers and amide containing ligands to obtain a PCP designed for the potential applications as a heterogeneous catalyst in Knoevenagel condensation reactions
„Hipphopp er ekki aðeins spegill þess sem er, heldur ætti það einnig að vera speglun þess sem getur orðið": Fjölþætt áhrif hipphopps
No full textÍ þessari ritgerð er fjallað um hipphopp sem félagslegt og menningarlegt fyrirbæri með áherslu á rapptónlist, sem er eitt af tjáningarformum hipphopps. Markmið ritgerðarinnar er að varpa ljósi á áhrif hipphopps út frá sjónarhorni mannfræðinnar, með tilliti til hugtaka á borð við menningu, andóf, sjálfumleikasköpun og kynþáttahyggju. Ritgerðin byggir á greiningu hugtaka, greiningu á mismunandi mannfræðilegum rannsóknum er varðar hipphopp og greiningu á lagatextum úr völdum hipphopp lögum. Leitast er við að varpa ljósi á það hvernig þetta menningarlega kerfi styður við sjálfsmyndarsköpun einstaklinga, hvernig andóf mótast hjá jaðarsettum hópum og hvernig upplifanir fólks af misrétti kemur fram í tónlistinni. Fræðileg umfjöllun er síðan sett í samhengi við rannsóknirnar og greiningu lagatextanna. Niðurstöður ritgerðarinnar sýna að hipphopp hefur mikil áhrif á sjálfsmyndarsköpun fjölda einstaklinga og veitir þeim rými til tjáningar. Hipphopp virkar sem form andófs sem felur í sér farveg til að gagnrýna hið ráðandi samfélag og ríkjandi valdakerfi. Jafnframt sýna niðurstöður ritgerðarinnar að hipphopp getur verið mikilvægt verkfæri í vitundarvakningu á hinum ýmsu vandamálum innan samfélags og meðal einstaklinga. Þar má sem dæmi nefna kynþáttafordóma og jaðarsetningu einstakra hópa. Hipphopp gegnir virku hlutverki sem menningarlegt afl sem endurspeglar og mótar aðstæður fólks ásamt því að vera vettvangur til þess að bregðast við félagslegu óréttlæti. Ljóst er að hipphopp er fjölþætt, síbreytilegt og flæðandi menningarlegt kerfi sem hefur raunveruleg áhrif á líf fólks
„Þetta skiptir bara öllu máli og er alveg samofið í starfið“: Hlutverk náms- og starfsráðgjafa í eflingu félags- og tilfinningahæfni nemenda í grunnskólum
No full textGóð félags- og tilfinningahæfni hefur margvísleg jákvæð áhrif á þroska barna og ungmenna til skemmri og lengri tíma. Félags- og tilfinninganám er gagnreynd nálgun til að kenna, móta og styrkja hæfnina og draga um leið úr fjölmörgum neikvæðum áhættuþáttum í þeirra lífi. Tilgangur þessarar rannsóknar er að varpa ljósi á reynslu og hlutverk náms- og starfsráðgjafa í grunnskólum af eflingu félags- og tilfinningahæfni nemenda sinna og hvaða merkingu þeir leggja í það hlutverk sitt. Rannsóknin byggir á eigindlegum viðtölum við átta náms- og starfsráðgjafa sem starfa í íslenskum grunnskólum, bæði af höfuðborgarsvæðinu og landsbyggðinni.
Helstu niðurstöður leiða í ljós að meginþættir félags- og tilfinningahæfni endurspeglist í innihaldi og markmiðum ráðgjafar í grunnskólum þar sem góð hæfni skapi skilyrði fyrir gott námsgengi, heilbrigðari sjálfsmynd og upplýstara val um framtíð nemenda. Niðurstöðurnar fanga þá sameiginlegu reynslu og sýn viðmælenda að félags- og tilfinningahæfni sé kjarni ráðgjafarinnar og tengist inn í flest önnur verkefni þeirra í grunnskólanum. Þær varpa einnig ljósi á tvíþætt eðli verkefnisins sem bæði er unnið í forvarnarskyni og sem viðbragð við aukinni þörf á stuðningi og ráðgjöf. Þá megi ekki vanmeta mikilvægi tengslamyndunar og þess persónulega sem skapi traust og rými til þess að vinna með viðkvæm málefni sem tengst geta tilfinningum og samskiptum. Viðmælendur líta á þetta sem eitt helsta og mikilvægasta hlutverk sitt í starfinu.
Þessar niðurstöður benda til þess að náms- og starfsráðgjafar í grunnskólum gegni í reynd lykilhlutverki í félags- og tilfinninganámi nemenda í grunnskólum og að ábyrgð á því hafi að einhverju leyti færst óformlega yfir á þá þó skýran ramma um það hlutverk skorti.Social and emotional competence has multiple positive effects on the development of children and adolescents both in the short and long term. Social- and emotional learning (SEL) is an evidence-based approach to teaching, developing and strengthening this competence while simultaneously reducing various negative risk factors in students’ lives. The purpose of this study was to examine the experiences and roles of school counselors in compulsory schools in relation to promoting students’ social and emotional competence and the meaning they assign to this role. The study was based on qualitative interviews with eight practicing school counselors working in Icelandic compulsory schools, both in the capital area and in rural regions.
The main findings indicate that the core components of social and emotional competence are reflected in the content and objectives of counseling in compulsory schools where good competence leads to improved academic progress, healthier self image and more informed educational and career choices of students. The findings capture the shared experiences and perspectives of the participants, who viewed social and emotional competence as the core of their counseling practice and as interconnected with most of their other responsibilities within the school. The results also highlight the dual nature of the role, which involves both preventive and responsive work to an increased need for support and counseling. Furthermore, the importance of relationship building and the personal dimension of counseling, which fosters trust and creates space to address sensitive issues related to emotions and interpersonal relationships, is emphasized.
Overall, the findings suggest that school counselors in compulsory schools play a key role in students’ social and emotional learning and that responsibility for this learning has to some extent been informally transferred to them, although a clearly defined framework for this role is lacking